Paul當年養過沙皮,雖然過身多年,但貪舊既佢一直好想養番隻沙皮狗,直至最近Paul終於搵到呢位Ail。
Paul鐘意沙皮狗性格沉實,遇到威脅會好惡,你睇Ail平時頭耷耷咁,係咪好溫馴先
金毛尋回犬Bach經常同Paul做善事,感情特別深厚,Bach既離世至今都令Paul最為難過。
Rock友狗狗
約黃貫中做訪問，好難。
Band界Rock友始祖阿Paul，平時勁忙，結他、音符、嘶叫填滿晒佢嘅時間。
自小與狗結緣嘅佢，屋企養咗8隻狗，今次抽空帶咗佢隻沙皮Ali出嚟，大談音樂背後嘅狗仔世界。
訪問過後，發覺阿Paul同Ali一樣，平易近人，call佢絕對唔難。
咁多年黎無買過狗
Paul對音樂狂熱,對狗既愛亦hot到滿瀉。Paul 12歲開始,已經與狗結下情緣,由細到大同狗建立出既感情。養狗多年更經歷過唔少悲、歡、離、合。
“細個既時候,屋企無野玩,得屋企隻狗。以前每日都會拖住隻狗出街周圍行,漸漸對狗建立出感情。無論開心唔開心,只要同隻狗出去行下,感覺就好似有個friend陪伴自己一樣。由我12歲直到依家,雖然不停都有養狗,但係咁多年黎,自己唔會買狗,因為香港實在有太多唔負責任既主人將狗遺棄,有朋友唔要,自己覺得佢可憐就會收養,養下養下屋企依家養左8隻狗。雖然我曾經o係九龍城某間相熟既寵物店睇中左隻美曲,重有衝動想買左佢,但係諗深一層,屋企已經有咁多隻狗,所以最終放棄。每次行過都會入去望下佢,點知有日老闆突然打俾我,佢話知我好鍾意隻美曲,於是就將佢送俾我,我當然開心啦!”
金毛離世最tough
咁多年黎Paul養過超過20隻品種,但係其中一隻叫Bach既金毛尋回犬,就令佢最難忘。
“Bach係隻狗醫生,以前我會經常同佢一齊出席好多慈善活動,每次佢去探D公公婆婆,都會好親切咁哄大家,之後就會坐o係最年老既公公婆婆側邊陪住佢地,所以令到唔少人都會對佢印象深刻。而我都覺得Bach最有靈性,o係咁多隻狗當中,我同佢感情最深厚。不過Bach 17歲因患心臟病同肺積水而離世,我重好記得Bach臨死之前,o係醫院深切治療部,佢意志力好驚人,點都唔係走。醫生同我講Bach已經無意識,叫我返屋企唞下,但我仍然堅持唔走,我知佢感覺到我o係佢側邊陪住佢,我好靜咁望住佢,我只係識望住佢,不段寫字,將我講唔出既說話寫晒出黎,醫生見我咁,就好無奈咁問我:『有無野可以幫到你呀!黃生,需唔需要食D野呀 』之後我只係答佢,如果你係想幫我就比紙我。到最後,寫左好多張紙Bach先離開,宜至而家封信我重好好保存住,不過就無打算公開,因為好多我同佢之間既事o係入面。”
走路與朱茵結緣
雖然Bach既離世令Paul好唔開心,但係亦因為一隻狗令佢同朱茵結緣。
“Guby係隻美曲,性格鍾意離家出走,每次我行出門口,佢就會靜雞雞跟住我,趁我無為意自己就走左出去。佢好多時行左去住o係我屋企樓下既朱茵屋企門口,所以試過好幾次朱茵抱住Guby走上黎俾番我,就係咁,我就約埋朱茵去放狗,之後重拍埋拖。拍拖之後阿茵都有問番我係咪特登教Guby成日走落黎,但係我絕對無咁做過,可以緣分真係註定。
沙皮狗係佢至愛
今次訪問Paul帶左隻佢至愛既沙皮狗Ail做訪問,Paul原來同沙皮狗有唔少情意結,更話中國人一定要養過中國狗添!
“以前掀起過China Fever(中國熱),好興養中國品種既狗,所以我都養過出產自中國既沙皮狗叫大沙皮。沙皮狗既性格好沉實、好穩定,佢地唔太鐘意郁,但一遇到威脅佢地就會變得好強。養左好耐既大沙皮老死之後,一直都好想搵番隻靚既沙皮狗,但係走遍好多地方都搵唔啱,就算去大陸試過攞佢細細個幅相俾狗鋪老闆睇,都話未見過咁靚既沙皮。直至7月前,首批引入沙皮狗到港既韋基舜先生,幫我搵到Ail,重將佢送左俾我,食家Ail住o係拳館,成為隻坐館狗。”
請先 登入 以發表留言。